काठमाडौंको तीनकुनेमा राजावादीहरूले गरेको हिंस्रक प्रदर्शनप्रति नेकपा एमाले अत्यन्त गम्भीर भएको र त्यसको निन्दा तथा भ्रत्सना गर्ने निर्णय गरेको जनाएको छ।
आइतबार बसेको केन्द्रीय सचिवालयको बैठकले उक्त निर्णय गरेको महासचिव शंकर पोखरेलले प्रेस विज्ञप्तिमार्फत् जानकारी दिएका छन्।
लोकतान्त्रिक प्रणालीलाई बिथोलेर अराजकतातिर धकेल्ने अराजक र आपराधिक क्रियाकलापको छानबिन गरी दोषीलाई कारबाही गर्न समेत बैठकले सरकारको ध्यानाकषर्ण गराएको छ।
'शान्तिपूर्ण प्रदर्शनका नाममा सवारी साधनको प्रयोग गरी सुरक्षा घेरा तोड्ने, सुरक्षाकर्मीमाथि आक्रमण गर्ने, हतियार खोस्ने, सर्वसाधारण नागरिकका घर, व्यवसायिक भवन, सञ्चारगृह, राजनीतिक दलका कार्यालय र सरकारी भवनमाथि आगजनी गर्ने, लुटपाट गर्ने, जानी जानी हिंसा र आतंक सिर्जना गर्नेमाथि कारबाही गर्न...' महासचिव शंकर पोखरेलले जारी गरेको प्रेस विज्ञप्तिमा भनिएको छ।
यस्तै, एमालले सबै राजनीतिक दल, नागरिक समाज र आम नेपाली जनतालाई लोकतन्त्रका पक्षमा र पश्चगमनका दुष्प्रयासकाविरूद्ध गोलबन्द हुन आह्वान गरेको छ। प्रतिनिधिसभा र राष्ट्रियसभाको अवरोधका कारणले प्रतिस्थापन विधेयक पारित गर्ने प्रक्रियामा व्यवधान सिर्जना भइरहेको प्रति बैठकको ध्यानाकर्षण भएको जनाएको छ। त्यसका लागि राष्ट्रियसभा अध्यक्ष र प्रतिनिधिसभाका सभामुखको ध्यानाकर्षण समेत गरेको बताएको छ।
त्यसैगरी वैशाख ९ गते पार्टी स्थापना दिवसलाई युथ समिटका रूपमा मनाउने र उक्त समिटमा ४० वर्ष मुनिका ६ हजार युवाहरूको सहभागिता रहने एमालेको दाबी छ।
